Fékk hatursskilaboð í kjölfar ræðu um fordóma

Nadia Tamimi, íslömsk kona sem hélt í gær ræðu á á málþingi um stöðu múslima, birti í gærkvöldi hatursskilaboð sem henni bárust í naflausu SMS-i. Nadia segir í Facebook-færslu sinni ætla héðan í frá að birta öll slík „ógeðs skilaboð“ sem henni berast en í skeytinu er hún meðal annars kölluð „umskorna múslimatussa“ og sögð „ógeðsleg.“

Nadia er dóttir Salmanns Tamimi, fyrrverandi formanns félags múslima á Íslandi, en móðir hennar er íslensk. Í erindi hennar á málþinginu í gær sagðist hún oft hafa orðið fyrir fordómum Íslendinga vegna trúar sinnar.

„Alls staðar í kringum mig finn ég fyrir fordómum,“ segir í ræðu Nadiu, sem lesa má í heild sinni í viðhengi hér fyrir neðan. „Á hárgreiðslustofum bæjarins hef ég oft þurft að sitja við hliðina á fólki sem drullar yfir föður minn og trúna og oftar en einu sinni hef ég þurft að flýja með börnin mín út af ýmsum stöðum þar sem ég hef ekki áhuga á að þau heyri svona lagað um afa sinn eða trúna sína.“

Innlegg frá Nadia Tamimi.

Kenndi aldrei öllum kristnum um morð ömmu sinnar

Nadia tekur þó fram að hún telur flesta Íslendinga lausa við slíka fordóma. Þó særi alhæfingar hinna fáu og henni „svíði“  vegna þess hvernig ástandið sé í dag.

„Árásirnar gegn okkur ágerast,“ skrifar Nadia meðal annars. „ Múslimar kallaðir hryðjuverkamenn upp til hópa, og þá sé ég fyrir mér föður minn, afa, ömmu og frændfólk ... Mín reynsla af múslimum bæði hér heima og í Palestínu er að þeir eru upp til hópa yndislegt og góðhjartað fólk sem koma fram við mig af virðingu.“

Sjá einnig: Þingmaður spyr hvort „íslenskir múslimar“ hafi farið í þjálfunarbúðir hryðjuverkamanna

Nadia tjáir sig einnig í ræðunni um dauða móðurömmu sinnar, Sigurbjargar Einarsdóttur. Hún var myrt á heimili sínu af ókunnum manni árið 1999, þá áttatíu ára gömul.

„Þarna missti ég það sem var mér kærast,“ skrifar Nadia. „Sorgin yfirtók mig og reiðin líka en aldrei, ekki einu sinni, kom í huga mér að kenna öllum kristnum mönnum um, öllum Íslendingum, eða öllum hvítum mönnum … ég kenndi þessum eina manni um og ég geri enn!“