SA segjast vilja rétta hlut tekjulægstu hópa

„Samtök atvinnulífsins hafa lagt mikið af mörkum til að leysa deilurnar þótt viðsemjendur okkar haldi öðru fram,“ segir Björgólfur Jóhannsson, formaður SA, í bréfi sem hann sendi félagsmönnum í gær. Þar segir hann jafnframt að lítið hafi þokast í kjaraviðræðunum undanfarið.

Í bréfinu fer Björgólfur hins vegar yfir þá þætti sem SA hafi rætt við samningaborðið. Þannig hafi verið viðraðar hugmyndir um þriggja ára kjarasamning með „verulegri hækkun lágmarkstekjutryggingar“ svo lægstu laun dugi betur til lágmarksframfærslu.

„Samtök atvinnulífsins hafa einnig boðið verulega hlutfallshækkun launa ásamt sérstakri hækkun dagvinnulauna gegn því að samið yrði um aukinn sveigjanleika dagvinnutímabils og lækkun yfirvinnuálaga.“ Með því móti segir Björgólfur að hægt væri að auka hér framleiðni og minnka yfirvinnu sem sé mun meiri hér á landi en í nágrannalöndunum.

„Til samans hefðu þessar leiðir leitt til rúmlega 20 prósenta hækkunar dagvinnulauna á samningstímanum,“ segir í bréfi Björgólfs.

Á sama tíma segir hann að átt hafi sér stað viðræður um aðkomu ríkisstjórnarinnar að gerð nýrra samninga þar sem framlag stjórnvalda yrði meðal annars að ráðast í skattkerfisbreytingar sem myndu tryggja aukinn kaupmátt ráðstöfunartekna launafólks. „Að því gefnu að launabreytingar yrðu innan skynsamlegra marka.“

Þá standi til að gera jákvæðar breytingar á húsnæðiskerfinu til að auðvelda fólki með lágar tekjur að eignast eigið húsnæði eða leigja.

„Verkalýðshreyfingin hefur til þessa hafnað því að semja á þessum nótum og heldur fast í kröfur um tugprósenta hækkanir á skömmum tíma sem munu hafa slæmar afleiðingar í formi aukinnar verðbólgu, hærri vaxta, fækkunar starfa og stöðnunar í efnahagslífinu,“ segir Björgólfur í bréfinu og kveðst vonast til að snúa megi við þróun mála. „Því það stefnir í óefni ef ekki verður almenn viðhorfsbreyting.“ Hann hvetur atvinnurekendur til að „ræða stöðu mála“ við starfsfólk sitt og hvaða áhrif leið verkalýðshreyfingarinnar hafi.