Söfnuðu 90 þúsund krónum: „Það er hægt að breyta rosalega miklu með litlu“

„Þetta byrjaði af því að við vorum að læra um fátækt og svoleiðis,“ segir Björg Bergsteinsdóttir, nemandi í 10. bekk í Setbergsskóla en hún ásamt bestu vinkonu sinni safnaði tæplega nítíu þúsund krónum til styrktar UNICEF. Peningarnir voru afhentir í dag og þá fengu krakkarnir í árgangnum sem tóku þátt viðurkenningarskjal frá hjálparsamtökunum. „Kennarinn okkar sagði að það væri hægt að kaupa hús sem hægt er að byggja frá grunni fyrir munaðarlaus börn.“

Málið var rætt í bekknum og mikill áhugi var fyrir því að leggja börnum víðsvegar um heiminn sem hafa það ekki jafngott og börn hér á landi lið. „Við besta vinkona mín ákváðum bara að framkvæma verkefnið.“

Vildu auka möguleika barnanna á menntun

Stúlkurnar höfðu lagt upp með að safna 130 þúsund krónum sem dugir fyrir húsi. „En því miður náðum við ekki því markmiði en við söfnuðum nítíu þúsund,“ útskýrir Björg. Ákveðið var að nýta peninginn til þess að kaupa skólagögn, vatnsdælur og bóluefni fyrir börnin. En af hverju ákváðu stelpurnar að taka þátt í verkefninu? „Örugglega fyrst og fremst af því að þúsund krónur eru ekki eins mikið fyrir okkur og þær eru fyrir þau. Þetta fólk þarna úti hefur það ekkert rosalega gott og það er hægt að breyta rosalega miklu með litlu.“

Björgu þótti mikilvægt að geta aðstoðað börnin við að sækja sér menntun og þess vegna völdu þær stöllur að gefa skólagögn. „Svo var okkur sagt að ef við kaupum vatnsdælu þá þurfa krakkarnir ekki að labba langa leið til að sækja vatn. Þá erum við að spara krökkunum tíma og þau geta þá lært í staðinn. Við viljum auka menntun barnanna.“

Framtakið hjálpar virkilega börnum úti í heimi

Sigríður Víðis Jónsdóttir, upplýsingafulltrúi UNICEF á Íslandi, segir safnanir sem þessar hafa mikil áhrif á líf barna í þróunarlöndunum. „Þetta hefur bein áhrif á líf barna um víða veröld þar sem að nemendurnir náðu að safna. Það mun tryggja börnum hreint vatn í gegnum vatnsdælu sem þau náðu að safna fyrir, börn munu fá námsgögn, skammta af bóluefni gegn mænusótt. Þannig að þetta á virkilega eftir að koma í góðar þarfir. Þetta sýnir bara að framtak barna á Íslandi getur virkilega hjálpað börnum annars staðar í heiminum,“ sagði Sigríður.

Verkefnið sem krakkarnir völdu hjá UNICEF kallast Sannar gjafir.

Sannar gjafir UNICEF eru lífsnauðsynleg hjálpargögn fyrir bágstödd börn. Gjöfunum er dreift til barna og fjölskyldna þeirra í samfélögum þar sem þörfin er mest. Börnin völdu því með beinum hætti í hvaða lífsnauðsynjar peningarnir sem þau söfnuðu fara. Þeirra gjöf skilaði einni vatnsdælu, námsgögnum fyrir 80 börn, 200 skömmtum af bóluefni gegn mænusótt, 200 skömmtum af bóluefni gegn mislingum, 600 skömmtum ormalyfi og 150 skömmtum af vítamínbættu jarðhnetumauki fyrir vannærð börn.