Hæstu laun í vinnuskólum sjöfalt hærri en þau lægstu

Börn fædd árið 1999 sem vinna í vinnuskóla Fjarðabyggðar eiga möguleika á að vinna sér inn tæplega sjö sinnum meiri pening en jafnaldrar þeirra í vinnuskóla Hafnarfjarðar í sumar. Þetta kom í ljós við úttekt Fréttablaðsins á launum starfsmanna vinnuskóla ellefu sveitarfélaga á landinu. 

Við úttektina kom í ljós að mikill munur er á launakjörum starfsmanna vinnuskóla sveitarfélaganna í sumar og virðist lítil samræming vera milli sveitarfélaga. Munur er milli sveitarfélaga í launum og launamun árganga. Einnig er mikill munur á því hversu marga tíma árgangarnir fá að vinna auk þess sem sveitarfélögin dreifa tímanum ójafnt á árganga. Sums staðar fá árgangar jafnmarga tíma en annars staðar er munurinn meira en þrefaldur.

Tímakaup starfsmanna í Fjarðabyggð fæddra 1999 er að sama skapi næstum tvöfalt tímakaup starfsmanna í Garðabæ fæddra 1999. Austfirðingurinn fær 1101 krónu á tímann en Garðbæingurinn 580 krónur.

Sveitarfélögin sem úttektin nær til eru sveitarfélög höfuðborgarsvæðisins auk Ísafjarðarbæjar, Árborgar, Akureyrar, Fjarðabyggðar og Reykjanesbæjar.

Þeir starfsmenn vinnuskólanna sem Fréttablaðið ræddi við kvöddust ánægðir með vinnuna og sögðu hana betri en enga. Sömuleiðis sögðu þeir ágætt að hafa eitthvað kaup, sem þó mætti vera betra.

Starfsmenn vinnuskólans í Fjarðabyggð fá hæsta tímakaupið í öllum aldursflokkum sem úttektin nær til, það er að segja börn fædd frá árinu 1999 til 2001. Lægsta kaupið hjá starfsmönnum fæddum 1999 og 2000 fá börn í Garðabæ en börn fædd 2001 fá minnst í Hafnarfirði.

Sömuleiðis fá starfsmenn mismargar klukkustundir af vinnu yfir sumarið. Elsti árgangurinn fær mest í Fjarðabyggð, 280 klukkustundir, en minnst í Hafnarfirði, 78 klukkustundir. Árgangurinn fær ekki vinnu á Akureyri.

Uppfært 11:00 Það er ekki rétt eins og kemur fram hér að ofan að árgangurinn fái ekki vinnu á Akureyri. Þeir unglingar fá allt að 180 klukkustundir yfir sumarið.

Börn fædd 2000 fá mesta vinnu í Árborg, 182 klukkustundir, en minnsta í Hafnarfirði, 78 klukkustundir.

Yngsti árgangurinn fær mesta vinnu í Ísafjarðarbæ, 120 klukkustundir, en minnsta í Mosfellsbæ, 52 klukkustundir. Árgangurinn fær hvorki vinnu í Reykjavík né Reykjanesbæ.

Heildarlaun möguleg eru langhæst hjá elsta árgangnum í Fjarðabyggð, rúmar 300 þúsund krónur. Næsthæst heildarlaun fá jafnaldrar þeirra í Árborg, rúmar 140 þúsund krónur.

Lægstu heildarlaunin fá börn fædd 2001 í Mosfellsbæ, um 20 þúsund krónur. Næstlægst heildarlaun fá jafnaldrar þeirra í Hafnarfirði, rúmar 30 þúsund krónur.

Öll börn sem sóttu um starf í vinnuskólum sveitarfélaganna fengu störf í ár.