Argentínufanginn laus úr fangelsi og kominn heim

Tuttugu og fjögurra ára gamall Íslendingur, Sölvi Magnússon, sem hlaut fjögurra og hálfs árs fangelsisdóm í Argentínu í mars í fyrra fyrir kókaínsmygl er laus úr fangelsi og kominn til Íslands.

Maðurinn var handtekinn á flugvellinum í Buenos Aires í Argentínu í október 2013 með fjögur og hálft kíló af kókaíni í fórum sínum. Hann var þá á leið frá Argentínu til Alicante á Spáni.

Á sínum tíma var greint frá því að um fyrsta brot mannsins var að ræða og var talið að hann þyrfti ekki að afplána nema hluta dómsins, eins og nú liggur fyrir. Þá kom jafnframt fram að fjögurra og hálfs árs fangelsi væri lágmarksrefsing fyrir brot af þessu tagi í Argentínu.