Biðlar til stjórnvalda að setja börnin í forgang

Alsírsk blaðakona, sem beðið hefur í tvö ár eftir dvalarleyfi á Íslandi fyrir sig og börnin sín þrjú, segist ekki geta snúið aftur til heimalands síns þar sem hún sæti ofsóknum fyrir skrif sín. Lögfræðingur segir það mannréttindabrot af hálfu íslenskra stjórnvalda að láta fjölskyldu með ung börn bíða svo lengi í óvissu. 

Feriane Amrouni er þriggja barna móður sem kom hingað ti lands frá Alsír sem flóttamaður fimmta febrúar 2013. Eldri börn hennar eru nú sex og þriggja ára og ganga í grunn- og leikskóla í Reykjanesbæ. Yngstu stúlkuna eignaðist hún hér á landi, en hún er nú sautján mánaða. 

Áður en Feriane eignaðist sitt fyrsta barn starfaði hún sem blaðakona hjá dagblaðinu El Borham í Alsírborg. Hún segist hafa sætt ofsóknum vegna skrifa sinna um menntun og réttindi kvena, og orðið fyrir grófu áreiti á götum úti. Þá segir hún að eiginmaður hennar sé öfgatrúarmaður sem hafi meinað henni að fara út úr húsi án hans samþykkis. Hún hafi ekki viljað skilja við hann því að í Alsír fær eignmaðurinn alltaf börnin við skilnaðinn. Því hafi hún séð sér þann kost vænstan að flýja.

Í júlí 2013 var henni birt ákvörðun Útlendingastofnunar um að hún og börn hennar skyldu send til Frakklands á grundvelli Dyflinnarreglugerðarinnar.  Sú ákvörðun var kærð samdægurs til innanríkisráðuneytisins. Hún hefur því beðið í tvö ár í óvissu með börnin sín þrjú. Biðin er orðin erfið og vill hún veita börnum sínum örugga framtíð. 

Leifur Runólfsson, lögmaður Feriane, segir málið því miður lýsandi fyrir meðferð hælisleitenda. Sinnuleysi stjórnvalda sé algjört. Það gangi ekki þegar um börn er að ræða, með tilliti til Barnasáttmála Sameinuðu þjóðanna.