Atvinnuleysi 3,2% í júlí

Atvinnuleysi mældist 3,2% í júlí samkvæmt vinnumarkaðsrannsókn Hagstofu Íslands, en alls voru 197.500 einstaklingar á aldrinum 16-74 ára á vinnumarkaði í mánuðinum. Það jafngildir 84,5% atvinnuþátttöku. Af þeim voru 191.2000 starfandi og 6.300 án vinnu og í atvinnuleit.

Samanburður mælinga fyrir júlí 2014 og 2015 sýnir að atvinnuþátttaka minnkaði um 0,5 próstentustig. Hlutfall starfandi fólks af mannfjölda minnkaði um 0,3 stig og atvinnuleysi var nánast það sama og það var í júlí 2014.

„Samkvæmt árstíðaleiðréttingu var fjöldi fólks á vinnumarkaði 190.600 í júlí 2015 sem jafngildir 81,9% atvinnuþátttöku, sem er 1,3 prósentustigum lægri en hún var í júní. Fjöldi atvinnulausra í júlí var samkvæmt árstíðaleiðréttingu 8.100 sem er aukning um 1.800 manns frá því í júní. Hlutfall atvinnulausra jókst úr 3,3% í maí í 4,3% í júlí. Leiðrétt hlutfall starfandi fólks í júlí 2015 var 78,4%, sem er lækkun um tvö prósentustig frá því í júní,“ segir í frétt á vef Hagstofunnar.

Þar kemur jafnframt að þrátt fyrir þessa aukningu á milli mánaða þá sýna tölurnar að atvinnuleysi heldur áfram að lækka, eða um 0,2 prósentustig sé horft til síðustu sex mánaða og um 0,7 prósentustig á síðustu tólf mánuðum.