Hvetja menntskælinga til þess að hjóla í skólann

Átakið hjólum í skólann fer fram í annað skipti þessa vikuna. Nemendur og starfsmenn framhaldsskóla landsins keppa sín á milli um að nýta virkan ferðamáta sem oftast í og úr skóla, en með virkum ferðamáta er átt við t.d. að hjóla, ganga, hlaupa, fara á hjólabretti/línuskautum eða í strætó til og frá skóla.

Markmið verkefnisins er að vekja athygli á virkum ferðamáta sem heilsusamlegum, umhverfisvænum og hagkvæmum samgöngumáta meðal nemenda og starfsmanna framhaldsskólanna.

Á meðan á verkefninu stendur verður dregið úr skráðum þátttakendum og geta þeir unnið hjólatösku með viðgerðasetti og síðasta daginn verður svo dregið út glæsilegt TREK reiðhjól að verðmæti 100.000 kr. frá reiðhjólaversluninni Erninum.

Vinningshafar verða tilkynntir á útvarpsstöðinni FM957 á hverjum degi meðan á verkefninu stendur.

Auk þess geta tveir heppnir einstaklingar unnið 25.000 kr. inneignarkort frá Valitor með því að taka mynd og setja á Instagram merkta #hjolumiskolann.

Skráning fer fram á vefsíðu átaksins og hægt verður að skrá sig alla vikuna.

Hjólum í skólann er samstarfsverkefni Íþrótta- og Ólympíusambands Íslands, Hjólafærni á Íslandi, Embætti landlæknis, Reykjavíkurborgar, Samgöngustofu og Sambands Íslenskra framhaldsskólanema.