Dagur upplýsir hverjir aðstoða hann í árlegu vöffluboði

Dagur B. Eggertsson borgarstjóri furðar sig á umræðu um árlegt vöffluboð hans og eiginkonu sinnar á Menningarnótt. Framsóknarmenn hafa fjallað um málið á samfélagsmiðlum í dag en meðal annars spurði Karl Garðarsson, þingmaður flokksins, hvort rétt væri að borgin hafi borgað fyrir vöfflurnar. „Er það rétt skilið að borgin hafi borgað brúsann?“ spurði hann.

Þetta staðfestir Dagur sem segir að fyrirkomulagið hafi verið óbreytt í tíu ár. „Höfuðborgarstofa auglýsir eftir íbúum sem vilja taka þátt og leggur þeim til hráefni. Þetta hefur alltaf verið opinbert og aldrei farið leynt,“ segir hann á Facebook-síðu sinni. „Við höfum einfaldlega tekið þátt á sömu forsendum og aðrar fjölskyldur í hverfinu.“

Dagur vill einnig spara Framsóknarmönnum tíma og upplýsir í stöðuuppfærslunni hverjir aðrir hafa lagt sér lið við vöfflugerðina. „Fólk bætir auðvitað ýmsu við, og til að spara Framsóknarflokknum sporin þá vil ég upplýsa að við höfum þegið miklu meiri hjálp en þetta,“ segir hann og hefur upptalinguna. 

„Siggi bakari i Bernhöfts hrærir alltaf út fyrir okkur deigið, mamma og pabbi, móðursystur mínar, fjölskylda og vinir leggja iðulega fram hjálparhönd við að taka á móti gestum. Við fáum á hverju ári lánuð 10 vöfflujárn frá vinum og samstarfsfólki. Og þegar vöfflubakstri lýkur þá hjálpumst við að við að þrífa og við Arna eldum ofan í sjálfboðaliðana,“ upplýsir hann.

„Ég veit ekki hvað Framsókn finnst en mér hefði satt best að segja fundist hálf-skrýtið ef við hefðum hætt þessu þegar ég varð borgarstjóri,“ segir Dagur.

Post by Dagur B. Eggertsson.