Tuttugu mánaða fangelsi og ævilöng svipting ökuréttinda áréttuð

Emil Freyr Júlíusson var í gær dæmdur í tuttugu mánaða fangelsi fyrir ítrekuð fíkniefnabrot í Héraðsdómi Suðurlands. Hann þarf þó aðeins að sitja inni í þrjá mánuði haldi hann skilorði í þrjú ár. Þá var svipting ökurétta hans áréttuð.

Emil var dæmdur fyrir að hafa í janúar síðastliðnum ekið bifreið undir áhrifum eiturlyfja auk þess að hafa ekki ökuréttindi. Þeim hafði hann áður verið sviptur sex sinnum. Þá fundust 0,34 g af amfetamíni á honum á skemmtistaðnum Hressó í Austurstræti í febrúar. Emil var einnig dæmdur fyrir að hafa stolið Xbox tölvufjarstýringu úr Elko í Skeifunni.

Í dómnum kemur fram að ákærði hafi ungur að árum hafið brotaferil sinn og hafi hann verið óslitinn til loka árs 2010. Hefur hann fjórtán sinnum áður sætt refsingu þar af sjö sinnum vegna akstur undir áhrifum fíkniefna, sex sinnum vegna aksturs sviptur ökurétti og átta sinnum vegna auðgunarbrota. Var hann dæmdur í tveggja ára fangelsi árið 2010 fyrir  þjófnað, hylmingu, fjársvik, umferðarlagabrot og fíkniefnalagabrot og fjórtán mánaða fangelsi árið 2012 þegar hann var fundinn sekur um innbrot í tvö hús og rán á munum að andvirði um 50 milljón króna.

Verjandi Emils benti á að hann væri nú 26 ára gamall og virðist vera að ná góðum tökum á lífi sínu. Voru birt vottorð um lok meðferðar og meðmæli, annars vegar frá vinnuveitanda ákærða og hins vegar rekstraraðila áfangaheimilis þess sem Emil hefur á frá því í maí 2014. Kemur meðal annars fram í umræddum meðmælabréfum að hann sýni gott fordæmi í vinnu, sé öðrum heimilismönnum á áfangaheimilinu fyrirmynd og sé sannarlega að vinna í sínu lífi með trúnaðarmanni og með hjálp AA samtakanna. Hann sýni ábyrgð og staðfestu og sé með mikið jafnaðargeð. Þá sé hann duglegur í vinnu, mæti stundvíslega og sé þægilegur í viðmóti við aðra starfsmenn.

Þótti því við hæfi að skilorðsbinda sautján mánuði af tuttugu. Dóminn í heild sinni má lesa hér.