Gaf af sér rangar upplýsingar

Hæstiréttur hefur staðfest gæsluvarðhald yfir karlmanni sem fluttur var til landsins í því skyni að afhenda hann íslenskum yfirvöldum á grundvelli Dyflinnarreglugerðarinnar. Honum er gert að sæta gæsluvarðhaldi í fjórar vikur eða þar til honum verður vísað brott af landi.

Lögregla telur rökstuddan grun til að ætla að maðurinn hafi gefið rangar upplýsingar um hver hann er og hafi sýnt af sér hegðun sem gefi til kynna að af honum stafi hætta og kunni að grípa til frekari ofbeldis eða hótana um ofbeldi, gangi hann laus. Upplýsingarnar bárust frá Interpol þessa efnis að hann væri þekktur vegna ofbeldismála ásamt því að hafa áður gengið undir öðru nafni og fæðingardegi.

Upphaf málsins má rekja til ársins 2011 þegar Fjölskyldu- og félagsþjónustan tók á móti honum og fjölskyldu hans sem óskuðu hælis. Grunur lék á að maðurinn væri haldinn alvarlegum geðsjúkdómi vegna ýmissa erfiðleika sem höfðu stigmagnast jafnt og þétt sem leiddu til þess að hann var lagður inn á geðdeild Landspítalans 29.apríl síðastliðinn.  Hann var þó útskrifaður af geðdeild skömmu síðar, eða 9 maí, þar sem starfsmenn Landspítalans töldu öryggi starfsmanna og sjúklinga deildarinnar í hættu vegna veru hans á deildinni.

Héraðsdómur og hæstiréttur féllust því á að rökstuddur grunur væri um að maðurinn hafi gefið rangar upplýsingar um hver hann er og að hætta stafi af honum. Honum er því gert að sæta gæsluvarðhaldi til 24. október næstkomandi eða uns dómur verður kveðinn upp og honum vísað úr landi.