„Að hekla er eins og að anda“

„Að hekla er fyrir mér í raun eins og að anda,“ segir Linda Björk Eiríksdóttir sem hefur aldeilis sett skemmtilegan svip á höfuðborgarsvæðið að undanförnu.

Linda ásamt stórum hópi fólks sem kalla sig prjónagraffara hafa glætt Reykjavík nýju lífi með litríku prjónagarni. Hópurinn telur um tvö hundruð manns, flestir á höfuðborgarsvæðinu, en að sögn Lindu er fólk misvirkt. Þetta sé einungis áhugamál og til gamans gert.

„Við gerum þetta alltaf þegar færi gefst. Þetta er hópur af fólki á öllum aldri og báðum kynjum. Allir mega vera með,“ segir Linda.

Linda hefur ávallt verið afar hrifin af götulist og byrjaði hún að „prjónagraffa“ fyrir um það bil þremur árum síðan. Hún er mikil handavinnukona og hefur síðan hún man eftir sér verið með prjóna í höndunum. Listin er að erlendri fyrirmynd en hún sá hana fyrst í London fyrir nokkrum árum síðan.

„Mér eiginlega bara leiddist. Ég hafði séð svona garngraff á ýmsum stöðum úti í heimi og fannst þetta rosalega heillandi. Þetta er skemmtilegt kombó á milli graffítí og garns og eitthvað sem fer út fyrir rammann. Þetta er öðruvísi og fær fólk til að pæla og verða hissa.“

Listaverk hennar hafa vakið mikla athygli en hún er núna stödd í Denver í Bandaríkjunum þar sem hún tók að sér að skreyta hátíðina Taste of Iceland. Hún kemur aftur til landsins á næstu dögum þar sem hún mun taka að sér að skreyta fyrir Bleiku slaufuna.

„Maður vill helst gera þetta til að vekja athygli. Sérstaklega svona þegar fer að hausta í Reykjavík. Þá grípur þetta mann,“ segir hún en hópurinn notar helst sterka liti.

Hægt er að skoða þessi fögru listaverk víðs vegar borgina, meðal annars á Hlemmi. Myndir segja meir en þúsund orð en þær má sjá hér að neðan og á Facebook.