Hundurinn verður aflífaður

Rottweiler-hundurinn sem beit konu á áttræðisaldri í gær við matvöruverslun í Laugalæk verður aflífaður samkvæmt upplýsingum frá Hundaeftirliti Reykjavíkurborgar. Hann verður áfram í vörslu hjá eftirlitinu.

Líkt og Vísir greindi frá í gær var konan flutt á slysadeild en hún var illa bitin á handlegg svo blæddi úr auk þess sem fatnaður hennar skemmdist þar sem hún féll í götuna við árásina.

Að sögn lögreglu hafði Rottweiler-hundurinn verið bundinn en þegar eigandi hans var að losa hann, stökk hundurinn til og beit konuna.