Scolari: Munum spila fyrir Neymar

Það er mikil spenna fyrir leik Brasilíu og Þýskalands í undanúrslitum HM sem fram fer í kvöld.

Brasilía verður án sinnar stjörnu, Neymar, sem meiddist í leiknum gegn Kólumbíu í átta liða úrslitum keppninnar. Þjálfari liðsins, Luiz Felipe Scolari, segir að liðið geti vel gert það gott án Neymar.

„Neymar er búinn að skila sínu og nú er komið að öðrum að stíga upp. Við erum búnir að sætta okkur við stöðuna eins og hún er og hugsum nú um aðra hluti," sagði Scolari.

„Í þessum leik erum við ekki bara að spila fyrir okkur sjálfa og okkar drauma. Við erum líka að spila fyrir Neymar út af öllu sem hann hefur gert fyrir okkur."

Brasilía verður einnig án fyrirliða síns, Thiago Silva, sem er í leikbanni.