Einn hefur verið yfirheyrður vegna skemmdanna sem unnar voru á friðuðu húsi í Bolungarvík aðfaranótt mánudags. Fulltrúi lögreglunnar staðfesti í samtali við Vísi nú síðdegis að manninum hefði verið sleppt að lokinni yfirheyrslu. Hann hefði áfram stöðu grunaðs í málinu.
Karlmaður hringdi á bæjarskrifstofuna í Bolungarvík í gær og sagðist bera ábyrgð á því að skemmdarverkin voru framin. Sá hefði hins vegar ekki sjálfur framkvæmt gjörninginn að sögn Elíasar Jónatanssonar, bæjarstjóra Bolungarvíkur. Húsið sem varð fyrir skemmdunum er 105 ára gamalt og friðað.
Lögreglan staðfestir við Vísi að rannsókn málsins miði ágætlega. Nokkrar ábendingar hafi borist og sömuleiðis hvetji lögreglan alla sem hafi ábendingar fram að færa til þess að hafa samband. Frekari upplýsingar vildi lögreglan ekki veita.
Ekki liggur ljóst fyrir hvaða tæki var notað til að vinna skemmdir á húsinu. Sömuleiðis vekur athygli að engin vitni hafi tekið eftir því þegar skemmdirnar voru unnar. Þrjár traktorsgröfur eru í Bolungarvík en í ljósi þess hve gamalt húsið er og illa farið gætu önnur tæki, svo sem lyftarar, hafa verið notuð.
Lengi hafa deilur staðið yfir um húsið sjálft og hvort eigi að rífa það, eða gera það upp. Bæjarins besta sagði frá því í fyrra að Guðrún Stella Gissurardóttir og Soffía Vagnsdóttir hefðu gert bindandi tilboð í húsið. Þær hafi viljað koma upp þar framleiðslu og þjónustu sem byggði á sögunni um landnámskonuna Þuríði sundafylli.
Nú stendur yfir bæjarráðsfundur í Bolungarvík þar sem framtíð hússins verður rædd. Smiðir hafa gengið frá húsinu svo það hrynji ekki og lokað því.
Yfirheyrður eftir að hafa viðurkennt skemmdarverk
