Telur breytingu á verkaskiptingu ráðherra handahófskenndar

Árni Páll Árnason, formaður Samfylkingarinnar, telur illa staðið að flutningi dómsmála frá innanríkisráðuneytinu og telur breytingarnar handahófskenndar og klæðskerasaumaðar fyrir Hönnu Birnu Kristjánsdóttir. Þetta kom fram í sérstakri umræðu um stjórnarráð Íslands þar sem Bjarni Benediktsson, fjármálaráðherra, var til andsvara.

Bjarni Benediktsson gaf lítið fyrir gagnrýni Árna Páls. Benti Bjarni á að síðasta ríkisstjórn Vinstri grænna og Samfylkingar hefði verið iðin við kolann að færa málefni milli ráðuneyta og „endalausar hræringar“ í ráðherraskipan, eins og hann orðaði það. Nú heyra málefni dómsmála undir forsætisráðherra eftir að Hanna Birna Kristjánsdóttir sagði sig frá málaflokknum. Árni bendir á að fullnusturéttarfar er áfram í höndum innanríkisráðherra en dómstólar og lögreglan séu komin til forsætisráðherra. Árni telur Bjarna hafa brugðist í málinu sem formaður Sjálfstæðisflokksins.

„Þegar aðstoðarmaður ráðherra er ákærður fyrir að misfara með opinber gögn í ráðuneyti ráðherrans var ljóst að ráðherrann gat ekki setið áfram, það er ljóst,“ sagði Árni Páll Árnason í ræðu sinni á þingi.