Mamma Buckleys heilluð af Íslandi

„Hún hefur ekki komið til landsins en hana langar mikið að koma og er virkilega uppnumin að það sé verið að halda svona tónleika á Íslandi,“ segir Franz Gunnarsson en hann stendur fyrir tónleikum til heiðurs Jeff Buckley og hefur verið í sambandi við móður Buckleys, Mary Guibert, undanfarin ár.

Hann hitti hana fyrst árið 2007 á tónlistarhátíð í Bandaríkjunum. „Ég hef staðið fyrir Jeff Buckley-heiðurstónleikum áður en það var árið 2007. Skömmu áður hitti ég móður Buckleys á tónlistarhátíð í Bandaríkjunum og hún var alveg uppnumin yfir því að það væri verið að halda tónleika til heiðurs syni sínum á Íslandi. Hún komst því miður ekki þá en sendi okkur kveðjur á myndbandi sem sýnt var á skjá fyrir tónleikana 2007,“ útskýrir Franz.

Hann fékk í kjölfarið sendar sérstakar Jeff Buckley-gítarneglur og hefur verið í sambandi við hana síðan. „Hún stýrir öllu Buckley-batteríinu og hefur í nógu að snúast.“ Guibert kemst þó ekki á tónleikana í vikunni en á þeim verður farið yfir feril Buckleys.

„Við leikum hans vinsælustu lög en tilefni tónleikanna er 20 ára útgáfuafmæli Grace-plötunnar. Við leikum hana frá a til ö og einnig tökulög sem hann var að taka á tónleikum.“

Tónleikarnir fara fram á Gauknum á fimmtudagskvöld og hefjast stundvíslega klukkan 21.00.