Aðeins fimm verðmerktu rétt

Aðeins fimm fyrirtæki af 12 voru með allar verðmerkingar í lagi, þegar Neytendastofa kannaði ástandið á Akureyri á dögunum.

Neytendastofa heimsótti fjögur bakarí og var aðeins eitt bakarí með verðmerkingarnar í lagi. Hjá Brauðgerð Axels, Kristjánsbakaríi og hjá Bakaríinu við brúna voru gerðar athugasemdir bæði við verðmerkingar í kæli og ýmsar vörur í borði, eftir því sem fram kemur í frétt á vef Neytendastofu.

Verðmerkingar voru skoðaðar í fimm apótekum. Gerð var athugasemd við Lyf og heilsu í Hrísalundi og á Glerártorgi. Í Lyfjum og heilsu í Hrísalundi var snyrtivörustandur óverðmerktur, gleraugnastandur og ýmsar vörur við kassa. Í Lyfjum og heilsu á Glerártorgi vantaði verð á gleraugnastand, gos í kæli og á ýmsar vörur við kassa.

Farið var á tvær hársnyrtistofur og athugað hvort verðskrá yfir alla þjónustu væri sýnileg og einnig hvort söluvörur væru verðmerktar. Gerð var athugasemd við hársnyrtistofuna Hárkompuna þar sem hvorki var sýnileg verðskrá né söluvörur verðmerktar. Efnalaugin Hreint út var heimsótt og athugað var hvort verðskrá yfir alla helstu þjónustu væri til sýnis. Í ljós kom að svo var ekki.