Enginn flokkur hefur beðið um kjörskrárstofn

Stjórnmálaflokkar og stjórnmálasamtök hafa enn ekki óskað eftir því við forsætisráðuneytið að fá afrit af kjörskrárstofnum vegna komandi sveitarstjórnarkosninga eins og tíðkast hefur í áratugi.

Eins og fram hefur komið telur Persónuvernd vafa leika á að heimilt sé að afhenda slíkum aðilum kjörskrárstofna sem flokkarnir hafa notað í starfi sínu. „Berist slíkt erindi verður við afgreiðslu þess af hálfu stjórnvalda tekin afstaða til álitaefna sem uppi eru varðandi afhendingu umræddra gagna,“ segir í svari forsætisráðuneytisins til Fréttablaðsins.