Hafnarfjörður fer fram á forkaupsrétt

Hafnarfjarðarbær hefur tekið til athugunar hvort Stálskipum ehf. hafi verið óheimilt að selja frystitogarann Þór HF og færa aflahlutdeild hans á fimm önnur skip, án þess að bærinn nyti forkaupsréttar. Frystitogarinn hefur verið seldur til Rússlands.

Bæjarráð Hafnarfjarðar hefur falið bæjarstjóra að gera ráðstafanir til að virkja forkaupsrétt bæjarins.

Guðrún Ágústa Guðmundsdóttir bæjarstjóri segir að líklegt sé að bærinn muni leita réttar síns fyrir dómstólum, „Við teljum ljóst að ekki hafi verið farið að lögum.“

Bærinn mun á næstu dögum skila inn áliti sínu til ráðuneytisins um hvort salan hafi áhrif á atvinnulíf í bænum.

„Þetta er framsal á aflaheimildum sem er mjög stór hluti af þeim aflaheimildum sem tilheyra fyrirtækjum í bænum og við erum að missa af tækifærum í uppbyggingu í sjávarútvegi vegna þessa,“ segir Guðrún.

Fari svo að fallist verði á forkaupsrétt Hafnarfjarðarbæjar hefur bærinn heimild til að hnekkja sölu skipsins. Guðrún segir að fyrirtæki og einstaklingar innan bæjarins hafi lýst yfir áhuga á að kaupa skipið og aflahlutdeildir sem því fylgja.