Byrjað að sprengja

Bæjarstjóri og bæjarráð Fjarðabyggðar hleyptu í gær í sameiningu af fyrstu sprengingunni vegna Norðfjarðarganga Fanndalsmegin á laugardagskvöld og hófu með þeim formlega sjálfa jarðgangagerðina.

Af þessu tilefni fór einnig fram athöfn í nafni heilagrar Barböru, verndardýrlings námumanna, að kaþólskum sið og var líkneski af dýrlingnum komið fyrir innan við upphafsmörk ganganna. Að athöfninni stóðu Metrostav og Suðurverk, verktakar Norðfjarðarganga.

Páll Björgvin Guðmundsson, bæjarstjóri, segir að með samstilltri baráttu hafi tekist að gera Norðfjarðargöng að veruleika. Sú samvinna hafi náð þvert yfir stjórnmálaflokka og gömul hreppamörk í Fjarðabyggð og sé til vitnis um þann mikla samtakamátt sem í heimafólki býr. Það sé því við hæfi að fulltrúar allra stjórnmálaflokka í bæjarstjórn hafi í sameiningu hleypt þessari fyrstu sprengingu af. Þá þakkar hann einnig stuðning annarra sveitarfélaga á Austurlandi og mikilvæga liðveislu þeirra í baráttunni.

„Með þessum ánægjulega áfanga getum við litið sérlega björtum augum fram á veginn. Þó að þýðing Norðfjarðarganga sé gríðarleg hvað öryggi snertir og lífsgæði þeirra sem hér búa, þá nær áhrifasvæði þeirra langt út fyrir Norðfjörðinn. Fjarðabyggð er sem ungu sveitarfélagi gert kleift að mynda í reynd samsteypta heild. Styrkari stoðum er skotið undir atvinnulíf svæðisins og nýsköpun og þær mikilvægu stoðstofnanir sem starfa í Neskaupstað geta nú eflt til muna þjónustu sína við Austfirðinga,“ segir Páll.

Í bæjarráði Fjarðabyggðar eiga sæti Jens Garðar Helgason, formaður, Jón Björn Hákonarson, forseti bæjarstjórnar og Eydís Ásbjörnsdóttir, bæjarfulltrúi.