Þjóðskrá afhent 100 þúsund Íslykla

Íslykill númer 100 þúsund var gefinn út af Þjóðskrá Íslands í gær. Fyrsti Íslykillinn var afhentur í apríl í fyrra, og tók því innan við ár fyrir lyklana að ná þessum áfanga, að því er fram kemur á vef Þjóðskrár Íslands.

Íslykillinn er sérstakt lykilorð á netinu tengt kennitölu sem notaður er við innskráningu á vefnum island.is, á vefjum stofnana, sveitarfélaga, félagasamtaka og fyrirtækja. Lykilinn má í dag nota á 80 vefsvæðum, og eru daglegar innskráningar á bilinu 10 til 15 þúsund á hverjum degi.

Upplýsingar um Íslykla og eigendur þeirra eru dulkóðaðar og því ekki vitað hver fékk lykil númer 100 þúsund.

Finna má nánari upplýsingar um Íslykilinn á vefnum island.is.