Neita að borga sakarkostnað sjóðstjóra

Kópavogsbær ætlar ekki að verða við ósk fyrrverandi framkvæmdastjóra Lífeyrissjóðs starfsmanna Kópavogsbæjar um að greiða 595 þúsund króna sakarkostnað, sekt og lögfræðiinnheimtu í dómsmáli þar sem framkvæmdastjórinn var sakfelldur.

Í bréfi til Ármanns Kr. Ólafssonar bæjarstjóra rifjar Sigrún Ágústa Bragadóttir upp að hún hafi verið framkvæmdastjóri LSK í hruninu haustið 2008. Í umrótinu sem á eftir fylgdi hafi þáverandi stjórn ákveðið að lána Kópavogsbæ fé í formi peningamarkaðslána. Um var að ræða lán upp á allt að einum milljarði króna. Sigrún kveðst hafa fylgt þessari ákvörðun eftir. Það hafi leitt til uppsagnar í starfi, ákæru og síðan dóms í maí 2012.

„Undirrituð var starfsmaður LSK og laut ákvörðun og vilja stjórnar í starfi sínu. Undirrituð hefur vægast sagt orðið fyrir miklum skaða af völdum ákvörðunar þessarar stjórnar og telur fyllilega rétt að Kópavogsbær ábyrgist þennan kostnað sem ábyrgðaraðili sjóðsins,“ skrifar Sigrún bæjarstjóranum.

Ber aðeins að hlýða lögmætum skipunum

Bæjarráð vísaði ósk Sigrúnar til umsagnar hjá bæjarlögmanni. Frá embætti hans kom sú niðurstaða að bænum væri ekki skylt að bæta Sigrúnu kostnaðinn vegna málarekstursins á hendur henni.

„Í fyrsta lagi vegna þess að hún er ekki starfsmaður Kópavogsbæjar en í öðru lagi vegna þess að í starfi sínu fyrir LSK fór hún út fyrir umboð sitt,“ segir í umsögninni. Vísað er til þess að Sigrún hafi gefið Fjármálaeftirlitinu rangar upplýsingar.

„Í forsendum dómsins segir meðal annars að ekki verði litið svo á að umboð sem framkvæmdastjórinn hafði til þess að senda FME upplýsingar, hafi tekið til þess að gefa rangar upplýsingar,“ segir bæjarlögmaður. „Þá má vísa til þess að samkvæmt lögum um réttindi og skyldur opinberra starfsmanna er starfsmönnum að sjálfsögðu aðeins skylt að fylgja lögmætum skipunum yfirmanna sinna.“

Leiksoppur örlaganna segir þáverandi stjórnarformaður

Bæjarráð ákvað að fenginni umsögn bæjarlögmanns að hafna beiðni Sigrúnar. Gunnar I. Birgisson, sem var formaður stjórnar LSK á umræddum tíma og sakfelldur fyrir sama brot og Sigrún, mælti með að ósk hennar yrði samþykkt.

„Framkvæmdastjórinn stóð sig afar vel í starfi og stuðlaði meðal annars að því að tap LSK vegna hrunsins var mjög lítið miðað við aðra lífeyrissjóði. Framkvæmdastjórinn hefur verið leiksoppur örlaganna í þessu máli,“ bókaði Gunnar í bæjarráði.