Rodgers: Sársaukinn gerir okkur bara sterkari

Brendan Rodgers, knattspyrnustjóri Liverpool, er á því að sársaukinn sem fylgir því að kasta frá sér Englandsmeistaratitlinum á síðustu stundu eigi eftir að kenna liðsmönnum hans mikið.

Manchester City á nú titilinn vísan eftir sigur á Aston Villa í gær en Liverpool fór langt með að kasta honum frá sér þegar liðið gerði 3-3 jafntefli gegn Crystal Palace á mánudagskvöldið en þar komst liðið í 3-0.

Liverpool þarf að vinna Newcastle í lokaumferðinni á sunnudaginn og vona að stóri Sam og lærisveinar hans í West Ham vinni Manchester City á útivelli.

Þrátt fyrir svekkelsið sem fylgir þessum úrslitum í síðustu umferðum deildarinnar segir Rodgers að liðið hafi tekið stórstígum framförum og þessi reynsla eigi eftir að gagnast liðinu þegar fram líði stundir.

"Til að verða sigursæll þarftu líka að geta tapað. Ef þið horfið til baka á alla sigurvegarana hafa það allt verið lið og einstaklingar sem hafa tapað og síðan orðið meistarar," segir Brendan Rodgers.

"Við höfum bætt okkur mikið á þessari leiktíð og það er enn einn leikur eftir. Ef einhver hefði sagt við okkur í ágúst að við yrðum á toppnum fyrir síðustu vikuna í mótinu hefðum við tekið því. Við erum komnir í Meistaradeildina en það er svo margt til viðbótar sem við viljum afreka."