Þre­föld hálfleiksskipting og endur­koma hjá Chelsea

Chelsea kom til baka eftir að hafa verið 0-2 undir í hálfleik gegn West Ham United og vann 3-2 sigur á Stamford Bridge í kvöld. Þreföld skipting Liams Rosenior, knattspyrnustjóra Chelsea, gaf góða raun.

Með sigrinum komst Chelsea upp í 4. sæti deildarinnar. Liðið hefur unnið þrjá deildarleiki í röð. West Ham er aftur á móti enn í 18. sætinu, fimm stigum frá öruggu sæti.

West Ham náði forystunni á 7. mínútu þegar fyrirgjöf fyrirliðans Jarrods Bowen sigldi í fjærhornið.

Á 36. mínútu bætti Crysencio Summerville öðru marki við eftir fyrirgjöf frá Aaron Wan-Bissaka. Summerville hefur skorað í fjórum leikjum í röð.

Rosenior gerði þrefalda skiptinu í hálfleik og einn þeirra sem hann setti inn á, Joao Pedro, minnkaði muninn í 1-2 á 57. mínútu. Hann skallaði þá fyrirgjöf Wesleys Fofana í netið.

Á 70. mínútu skoraði svo annar varamaður, Marc Cucurrella, jöfnunarmark Chelsea.

Heimamenn voru ekki hættir og þegar tvær mínútur voru komnar fram yfir venjulegan leiktíma skoraði Enzo Fernández eftir sendingu frá Joao Pedro.

Á 11. mínútu í uppbótartíma fékk Jean-Clair Todibo, varnarmaður West Ham, rauða spjaldið fyrir ólæti.