Samgöngustofa komin undir eitt þak

Samgöngustofa stendur þessa dagana í stórræðum þar sem starfsemin verður öll flutt í eitt húsnæði á horni Háaleitisbrautar og Ármúla.

Frá upphafi hefur stofnunin haft þrjár mismunandi starfsstöðvar á höfuðborgarsvæðinu og má kalla þetta raunverulega sameiningu þeirrar stofnana sem með lögum urðu að einni 1. júlí í fyrra.

Breytingin mun þýða aukið hagræði fyrir þá sem sækja þjónustuna auk þess að stjórnsýslan verði samhentari í samgöngugreinunum.

Í tilefni af þessum tímamótum gekk starfsfólkið fylktu liði síðdegis frá hinum þremur gömlu starfsstöðvum og hittust í nýjum höfuðstöðvum.

Í fararbroddi skrúðgöngufylkinganna voru börn úr hópi Skólahljómsveitar Austurbæjar. Einn úr hópi göngufólks var nýskipaður forstjóri Samgöngustofu, Þórólfur Árnason, sem flytur nú á kunnuglegar slóðir, í húsið sem lengi gekk undir nafninu „Skýrr-húsið“ þar sem hann var áður forstjóri.