Nauðsynlegt að stækka flughlað á Akureyrarflugvelli

Forsætisráðherra vonar að Alþingi tryggi fjármuni til að hefja stækkun á flughlaðinu á Akureyrarflugvelli á næsta ári. En Ísavia hefur ekki haft fjármagn til að nýta allt það jarðefni sem fellur til við gerð Vaðlaheiðarganga, þótt félagið fái efnið sjálft endurgjaldslaust.

Þegar ráðist var í gerð Vaðlaheiðarganga sá menn sér leik á borði að hægt yrði að nota það mikla efni sem kæmi úr göngunum til að stækka flughlaðið á Akureyrarflugvelli. Hins vegar hefur engin fjárveiting fylgt málum þannig að ekki hefur verið hægt að keyra efnið í flughlaðið.

Akureyrarflugvöllur er einn þriggja alþjóðaflugvalla á Íslandi en þar eru aðstæður til að taka á móti stórum þotum ekki viðunandi og því þarf að stækka flughlaðið til norðurs þar sem einnig stendur til að byggja nýja flugstöð.

Sigmundur Davíð Gunnlaugsson forsætisráðherra átti fundi með bæjarfulltrúum og fleiri aðilum á Akureyri í gær vegna málsins.

„Það hefur reyndar verið unnin undirbúningsvinna en það er alveg rétt að það hefur skort fjármagn til að klára verkið. Hins vegar gefst núna smá tímabil, níu mánuðir eða svo, til þess að undirbúa það. Vegna þess að (bor) menn eru að fara að færa sig yfir í Fnjóskadalinn og þar er ekki vandamál að losna við efnið eða geyma það,“ segir forsætisráðherra.

Sá tími hljóti að verða nýttur til að undirbúa framhaldið. Alþingi hljóti sömuleiðis að skoða þetta mál þegar það kemur saman í haust.

„Því menn hljóta að vilja nota tækifærið til að nýta þetta efni í það að stækka flughlaðið sem er nauðsynlegt til þess að flugvöllurinn nýtist sem skyldi. Það eru mikil sóknarfæri í því og væri raunar æskilegt fyrir alla að það yrði t.d. meira um millilandaflug til og frá Akureyri. Álagið á suðvesturhluta landsins í ferðaþjónustu t.d. er orðið mjög mikið,“ segir Sigmundur Davíð.

En á sama tíma gæti svæðið í kring um Akureyri tekið á móti mun fleiri ferðamönnum. Mörg brýn verkefni bíði í samgöngubótum en þarna sé einstakt tækifæri vegna gangnagerðarinnar til að nýta allt það efni sem til fellur á hagkvæman hátt. Þá hafi göngin, sem ráðherra skoðaði í gær, hafa mikil og jákvæð áhrif.

„Og er gríðarlega mikill liður í því að stækka þetta atvinnusvæði og styrkja enn. Það er áhyggjuefni hversu mikið af fjárfestingu og uppbyggingu innviða og fólksfjöldanum hefur verið að þjappast saman á mjög afmörkuðum hlta landsins. En samgöngubætur eins og þær sem við erum að fylgjast með hér (Vaðlaheiðargöng) hjálpa mjög til við að rétta hlut landsbyggðarinnar,“ segir Sigmundur Davíð Gunnlaugsson.