Stærstu eldsúlurnar stærri en í gær

„Nú á þriðja degi eldgossins er ekki að sjá að neitt hafi dregið úr kraftinum, þvert á móti virðist sem stærstu eldssúlurnar séu jafnvel talsvert hærri og meiri en þegar við vorum þarna í gær.“ Þetta sagði Kristján Már Unnarsson fréttamaður sem flaug ásamt Agli Aðalssteinssyni myndatökumanni og fleirum yfir gosstöðvarnar í morgun.

„Öflugasti gígurinn þeytir hraunspýjunum í yfir hundrað metra hæð í mestu kviðunum. Mesta breytingin frá því í gær eru þessar miklu eldár, sem flæða út frá gígunum, þær eru fleiri og stærri en við sáum í gær og kvíslast eins og æðakerfi, og gossprungan pumpar út stöðugt meiri kviku sem í magni er á við flæði vatnsmestu stórfljóta landsins. Þá virðist okkur séð úr lofti sem sprungan sé ein samfelld eldtjörn og ekki er að sjá að hún sé neitt byrjuð að lokast.“

Kristján sagði gosmökkinn teygja sig upp í 13 þúsund feta hæð þegar myndirnar í myndskeiðinu voru teknar. „Að mati Veðurstofunnar er þó ekkert öskufall en það mælist hins vegar mikið brennisteinsvetni í mekkinum, íbúar á Egilsstöðum sjá sólina undarlega rauða og margir Héraðsbúar hafa fundið brennisteinsfnykinn í loftinu.

Vísindamenn áætluðu í gær að nýtt hraun þekti um fimm ferkílómetra svæði og lengstu hrauntungurnar næðu einn og hálfan kílómetra frá gossprungunni en útbreiðslan er vafalaust orðin mun meiri í dag.

Jarðeldurinn kom upp í Holuhrauni á mikilli sléttu sem jökulkvíslarnar undan Vatnajökli hafa myndað milli jökulsins og eldfjallsins Öskju. Það er til marks um hvað greiningartækni jarðvísindamanna eru orðin góð að gosraufin opnaðist nánast nákvæmlega á þeim stað sem þeir höfðu sagt að væri líklegastur, við enda kvikugangsins sem þeir röktu frá Bárðarbungu.“