Níu breytingar á byrjunarliði Íslands

Lars Lagerbäck og Heimir Hallgrímsson, landsliðsþjálfarar karla í fótbolta, gera miklar breytingar á byrjunarliðinu sem mætir Belgíu klukkan 19.45 í vináttulandsleik í kvöld.

Aðeins Ragnar Sigurðsson og fyrirliðinn Aron Einar Gunnarsson eru í byrjunarliðinu af þeim sem hafa byrjað síðustu þrjá leiki liðsins í undankeppni EM 2016 en nýliðinn Hörður Björgvin Magnússon, sem leikur með Cesena á Ítalíu, fær tækifæri í kvöld.

Alfreð Finnbogason og Viðar Örn Kjartansson spila saman í sókn Íslands og þeir Jóhann Berg Guðmundsson og Rúrik Gíslason koma inn á kantana. Helgi Valur Daníelsson er með Aroni Einari á miðjunni.

Hallgrímur Jónasson spilar við hlið Ragnars í vörninni en bakverðir eru þeir Birkir Már Sævarsson og nýliðinn Hörður Björgvin Magnússon. Ögmundur Kristinsson fær svo tækifærið í markinu í stað Hannesar Þórs Halldórssonar.

Sölvi Geir Ottesen hefur verið að glíma við meiðsli í baki síðustu daga og byrjar ekki í kvöld. Né heldur Ólafur Ingi Skúlason sem veiktist aðfaranótt þriðjudags.

Byrjunarlið Íslands:

Markvörður

Ögmundur Kristinsson

Hægri bakvörður

Birkir Már Sævarsson

Vinstri bakvörður

Hörður Björgvin Magnússon

Miðverðir

Hallgrímur Jónasson og Ragnar Sigurðsson

Hægri kantmaður

Rúrik Gíslason

Vinstri kantmaður

Jóhann Berg Guðmundsson

Tengiðilir

Aron Einar Gunnarsson (fyrirliði) og Helgi Valur Daníelsson

Framherjar

Alfreð Finnbogason og Viðar Örn Kjartansson