Aron Einar: Hef gengið í gegnum ýmislegt með landsliðinu

Ísland mætir Belgíu í vináttulandsleik hér í Brussel í kvöld en landsliðsfyrirliðinn Aron Einar Gunnarsson telur að leikurinn nýtist vel til að auka breiddina í liðinu.

„Þessir leikmenn sem fá að spila í leiknum vilja sýna sig og sanna. Vonandi gefa þeir Lars og Heimi hausverk fyrir sunnudaginn,“ sagði Aron Einar í viðtalinu sem má sjá í heild sinni hér fyrir ofan.

Ísland mætir Tékklandi í Plzen á sunnudagskvöld en bæði lið eru með fullt hús stiga á toppi A-riðli undankeppninnar eftir þrjá leiki. Ísland vann síðast 2-0 sigur á Hollandi og er von á 600 stuðningsmönnum Íslands á leikinn í Plzen.

„Ég hef verið í landsliðinu síðan ég var átján ára og hef gengið í gegnum ýmislegt. Við finnum vel fyrir áhuganum og stuðningurinn hefur verið magnaður eftir að við byrjuðum að spila vel.“

„Þetta hefur stigmagnast og áhuginn á landsliðinu aldrei verið meira en nú. Það er virkilega skemmtilegt að taka þátt í því en þegar ég var ungur fór ég í gegnum tímabil þar sem áhuginn á landsliðinu var ekki mikill. Þá var oft verið að leita að ástæðu til að sýna að við værum ekki að standa okkur vel.“

„En nú er þetta allt undir okkur sjálfum komið. Við viljum sýna að við erum með breitt bak og getum tekið við þessari pressu sem við höfum sjálfir sett á okkur.“