Ólafur Ingi klár í slaginn

Ólafur Ingi Skúlason verður til taks fyrir íslenska landsliðið sem mætir Belgíu hér í Brussel í kvöld.

Ólafur Ingi, sem leikur með Zulte Waregem í belgísku úrvalsdeildinni, veiktist aðfaranótt þriðjudags en er nú orðinn frískur á nú.

Hann var með á æfingu Íslands í hádeginu í dag, rétt eins og aðrir leikmenn liðsins að sögn Ómars Smárasonar, fjölmiðlafulltrúa KSÍ.

Það eina sem liggur fyrir er að Kári Árnason mun ekki spila með Íslandi í kvöld vegna támeiðsla en vonir eru bundnar við að hann nái leiknum gegn Tékklandi á sunnudagskvöld.

Allir aðrir leikmenn eru leikfærir og klárir í slaginn í kvöld. Leikurinn hefst klukkan 19.45 og verður í beinni textalýsingu á Vísi