Rannsókn vegna hópnauðgunar á lokastigi

Rannsókn lögreglu á máli piltanna fimm sem grunaðir eru um að hafa nauðgað sextán ára stúlku í Breiðholti í byrjun maí er á lokastigi. Gert er ráð fyrir að málið verði sent saksóknara innan tíðar. RÚV greinir frá málinu.

Piltarnir eru á aldrinum 17 til 19 ára. Stúlkan kærði nauðgunina til lögreglu þriðjudaginn 6. maí. Í kjölfar kærunnar voru piltarnir handteknir og í greinargerð lögreglu kemur fram að símar þeirra og tölvur hafi verið haldlagðar.  Piltarnir voru vistaðir í einangrun á Litla-Hrauni frá 9.maí og úrskurðaði hæstiréttur þá í gæsluvarðhald til 15.maí.

Atvikið átti sér stað í samkvæmi í Breiðholti aðfaranótt sunnudags 4.maí. Húsráðendur voru ekki heima en samkvæmið var þó haldið með þeirra vitneskju. Samkvæmt upplýsingum fréttastofu hafði þónokkur gestagangur verið um kvöldið en nauðgunin á að hafa átt sér stað þegar fáir gestir voru eftir í samkvæminu.

Atvikið var tekið upp á myndband af einum piltanna og hefur það gengið á milli fólks síðan verknaðurinn átti sér stað. Myndbandið er þó ekki aðgengilegt á internetinu, en hefur lögregla það undir höndum.

Fimmmenningarnir hafa verið nafngreindir á Facebook. Meðal þeirra sem nafngreindi þá er ung stúlka sem telur sig hafa vitneskju um málið.