Fimm piltar handteknir vegna hópnauðgunar

Fimm piltar voru leiddir fyrir dómara síðdegis í dag vegna ásakana um hópnauðgun. Heimildir Vísis herma að fimmmenningarnir séu á aldrinum sautján til nítján ára. Fórnarlambið er sextán ára menntaskólastúlka sem kærði nauðgunina síðdegis í gær. Í framhaldi hóf lögregla rannsókn sem leiddi til handtöku fimmmenningana í dag.

Atvikið mun hafa átt sér stað í Breiðholti aðfararnótt sunnudags og samkvæmt heimildum Vísis þá þekktust hinir kærðu og fórnarlambið fyrir atvikið.

Lögregla fór fram á viku gæsluvarðhald yfir ungu mönnunum. Dómari tók sér frest þangað til klukkan ellefu í fyrramálið til að ákveða hvort dómurinn verði við kröfu lögreglu. Samkvæmt heimildum Vísis verða mennirnir í haldi lögreglu þar til úrskurður liggur fyrir á morgun.

Allir piltarnir fimm eru sakaðir um að hafa nauðgað stúlkunni.

Uppfært klukkan 17: Fyrr í dag var sagt að allir fimm væru yngri en átján ára. Svo er ekki þó þeir séu það flestir.