Forsetanum fannst mjög leiðinlegt í Reykjavík

Forseti Íslands segist aldrei hafa lesið eins mikið af bókum eins og fyrsta árið sem hann bjó í Reykjavík því honum leiddist svo að búa í höfuðborginni.

Í gær var haldin stofnfundur bókabæjanna fyrir austan fjall en Sveitarfélagið Ölfus, Hveragerðisbær og Sveitarfélagið Árborg hafa sameinast um að gerast bókabæir. Kristín Helga Gunnarsdóttir, formaður rithöfundafélags Íslands segist vera ákaflega ánægð með verkefni sveitarfélaganna en hún flutti ávarp á stofnfundinum.

„Mér líst alveg stórkostlega á þetta, það er svo stór framtíðarsýn og menn eru svo metnaðarfullir. Það er búið að kynna hér svo ótrúleg verkefni og mér leist svo vel á það þegar verkefnisstjórnin greindi frá því að fólk, sem keyrði niður kambana ætti þá strax að fá það að tilfinninguna að það væri komið í bókabæina“, segir Kristín Helga.

Hún segist vera ósátt við stjórnvöld, sem vinna gegn bókinni með því að setja bókaskattinn, sem á að leggjast af aukinni hörku á bókaútgáfuna. En hver er staða íslensku bókarinnar ?

„Það er alltaf barátta í gangi, bókin er að slást við nýja og sjávirka miðla. Verkefni okkar er að draga nýjar kynslóðir að bókinni því ekkert hefur verið uppgvötað í veröldinni , sem virkar jafn vel og lestur til að örva huga og auka skilning ungu kynslóðarinnar, sem tekur við“.

Forseti Íslands flutti líka ávarp á stofnfundinum í gær. Hann segist sjaldan eða aldrei hafa lesið eins mikið og fyrsta árið sem hann bjó sem ungur maður í Reykjavík.

„Já, ég les mjög mikið, ég hef reyndar alltaf gert það. Þegar ég kom strákur vestan að fjörðum til Reykjavíkur þá fannst mér mjög leiðinlegt í Reykjavík. Þá fann ég borgarbókasafnið í Þingholtunum, sem þá var í glæsilegu húsi. Þennan fyrsta vetur held ég að ég hafi klárað allar bækurnar í barnabókadeildinni í Borgarbókasafninu. Bækurnar björguð þannig fyrsta árinu mínu í Reykjavík,“ segir Hr. Ólafur Ragnar Grímsson.