Mikilvægt að hlúa að dýrum vegna ótta við flugelda

Mikilvægt er fyrir gæludýraeigendur að vita hvernig bregðast á við um áramót því dýr hræðast yfirleitt sprengingar. Þetta segir Þóra Jóhanna Jónasdóttir, dýralæknir hjá Matvælastofnun.

„Best er að koma bæði hestum og gæludýrum fyrir inni, byrgja glugga, spila tónlist, hafa ljós kveikt og reyna að róa dýrin,“ segir Þóra. „Ef ekki er hægt að hafa hesta inni á helst að hafa þá þar sem þeir þekkja vel til og fylgjast með þeim því dæmi eru um að hestar brjótist út fyrir girðingar og valdi sér og öðrum skaða.“

Sama gildi um gæludýr. „Best er að halda köttum alveg inni dagana í kringum áramót og hafa hunda alltaf í taumi þegar þeim er hleypt út. Dæmi eru um að hundar tryllist þegar þeir heyra sprengingar og hlaupi af stað, verði fyrir bíl eða týnist.“

Þá bendir Þóra á að til séu úrræði á borð við kvíðastillandi lyf ef dýr eru mjög hrædd. Mikilvægt sé þó að gefa dýrum ekki slíkt nema að höfðu samráði við dýralækni.

Frekari leiðbeiningar um hvernig best sé að hlúa að velferð dýra um áramót má finna á vef Matvælastofnunar.