Tveir meltingarlæknar í viðbót segja upp

Kjartan Örvar Sigurðsson, læknir á meltingardeild Landspítalans, sagði upp starfi sínu á spítalanum í gær. Sömu sögu er að segja um Óttar Már Bergmann. Sigurður Ólafsson, settur yfirlæknir meltingarlækninga á Landspítalanum, segist skilja vel að menn sjái sér ekki lengur fært að starfa á spítalanum.

„Það stemmir. Ég lagði inn uppsögn mína í gær. Það eru bara sömu forsendur og hafa verið í umræðunni hjá Jóni Örvari sem var fyrstur til þess að segja upp,“ segir Kjartan í samtali við Vísi. Jón Örvar Kristinsson meltingalæknir sagði upp starfi sínu fyrir helgi og birti uppsagnarbréf sitt á Facebook.

„Ég hef sömu ástæður og hann fyrir að segja upp. Eins og staðan er í dag þá er þetta hálfa starf mitt á Landspítalanum að engu metið. Ég lít svo á að engin breyting sé að verða á því,“ segir Kjartan Örvar.

Erum engir víkingar

Líkt og Jón Örvar er Kjartan í 60 prósent starfi á Landspítalanum en starfar svo líka á lækningastöð úti í bæ. Hann segir óvíst hvað taki við hjá honum.

„Um leið og maður losar sig úr hálfu starfi þarf maður að fara annars staðar inn,“ segir Kjartan Örvar sem er kominn vel á sextugsaldurinn.

„Ég er orðinn 57 ára en er samt tilbúinn að fara utan,“ segir Kjartan Örvar. Hann bendir á að hið sama gildi um fjölmarga kollega á svipuðum aldri. Það sýni hve mikill pirringur sé í mönnum á spítalanum.

„Við höfum allir unnið erlendis og vitum út í hvað við erum að fara. Þetta er engin óvissa. Við erum engir víkingar og vitum alveg hvað bíður okkar,“ segir Kjartan Örvar. Þótt það sé gott að búa á Íslandi þá gildi það um fleiri staði.

Varla nokkur annar með þekkinguna

Sigurður Ólafsson, settur yfirlæknir meltingarlækninga á Landspítalanum, staðfestir í samtali við Vísi að Óttar Már Bergmann hafi einnig sagt upp störfum. Sigurður bendir á að sérgreinin, meltingalækningar, sé afar stór sérgrein innan lyflækninga sem sinni mjög breðiðum og stórum hópi sjúklinga. Auk almennra meltingarfæravandamála sinni þeir sérhæfðustu vandamálum og tilfellum á spítalanum.

„Þarna er um að ræða þrjá framúrskarandi lækna sem hafa sagt upp. Þessir þrír hafa á undanförnum árum lagt fram gríðarlega mikilvæga og mikla vinnu á Landspítalanum,“ segir Sigurður.

„Sum verkin sem þeir sinna eru þess eðlis að varla nokkur annar læknir í landinu hefur sömu þekkingu eða reynslu.“

Voru áður átta til níu á deildinni

Sigurður segir mikinn skaða fyrir heilbrigðiskerfið að missa læknana þrjá og það valdi sér verulegum áhyggjum.

„Ég skil það vel að læknar, með sérþekkingu eins og þessir þrír, sjái sér ekki fært að vinna lengur við þau kjör sem eru í boði.“

Læknarnir þrír voru allir í 60 prósent stöðu við Landspítalann. Í uppsagnarbréfi Jóns Örvars kom fram að hann væri með 358 þúsund krónur í laun á spítalanum. Sigurður segir að þegar uppsagnirnar taka gildi muni verða eftir þrjú og hálft stöðugildi á deildinni á Landspítalanum. Fyrir læknaflóttann sem verið hafi undanfarin ár hafi deildin talið átta til níu lækna.

Sigurður segist ekki vita til þess að fleiri á deildinni ætli að segja upp. Ástandið sé hins vegar slæmt enda séu læknarnir nú þegar störfum hlaðnir.