Hafa trassað að innleiða Evrópulöggjöf í rúm sjö ár

ESA, eftirlitsstofnun EFTA, hefur sent íslenskum stjórnvöldum erindi þar sem útskýringa er krafist á því hvers vegna ekki sé búið að innleiða Evrópulöggjöf um raforku hér á landi. Sjö ár eru síðan stjórnvöld áttu að innleiða löggjöfina.

Erindi ESA kemur í kjölfar kvörtunar sem stofnuninni barst þann 8. ágúst síðastliðinn. Í kjölfarið sendi ESA bréf til iðnaðar- og nýsköpunarráðuneytisins þar sem ráðuneytið er krafið svara um ýmis atriði er varða innleiðingu Evrópulöggjafar í orkumálum áður en formleg athugun verður hafin.

Komist ESA að þeirri niðurstöðu að íslensk stjórnvöld hafi ekki uppfyllt skuldbindingar sínar gagnvart EES getur eftirlitsstofnunin stefnt íslenskum stjórnvöldum fyrir Evrópudómstólinn.

Kvörtunin til ESA snýst um að íslensk stjórnvöld hafi ekki innleitt að fullu löggjöf um innri markað raforku. Sú löggjöf var samþykkt 2005 og var EES-ríkjum gefinn frestur til 1. júní 2007 til að innleiða hana.

Dr. Gunnar Þór Pétursson, dósent við lagadeild Háskólans í Reykjavík og sérfræðingur í Evrópurétti, segir það ekki óvanalegt að ESA fái inn á borð til sín kvartanir sem þessar. Það sé þó sjaldgæft að kvartanir berist vegna vanefnda á innleiðingum tilskipunar sjö árum eftir að hún átti að taka gildi. 

„Við vitum af svonefndum innleiðingarhalla hér á landi þar sem við Íslendingar erum einna slakastir EES-ríkjanna í að innleiða Evrópulöggjöfina tímanlega. Hvað raforkulöggjöfina snertir þá hefur Ísland innleitt hluta af raforkulöggjöfinni. Ef svo reynist að íslensk stjórnvöld hafi ekki innleitt alla löggjöfina þá gæti það verið brot á EES-sáttmálanum,“ segir Gunnar Þór. 

Hann segir að sá möguleiki sé fyrir hendi að brot sem þetta geti haft bótaskyldu í för með sér, ef einstaklingar eða fyrirtæki hafa orðið fyrir tjóni.