Harma að samningaviðræður ríkis og lækna hafi siglt í strand

Allt stefnir í að læknaverkfall hefjist á miðnætti annað kvöld. Félag almennra lækna (FAL) hefur sent frá sér ályktun vegna þessa þar sem harmað er að samningaviðræður ríkisins og lækna hafi siglt í strand.

„Heilbrigðisþjónustan er ein af grunnstoðum samfélagsins og telur stjórn FAL að hún glími nú þegar við veruleg vandamál vegna ónógrar nýliðunar og landflótta lækna síðast liðinn áratug. Slök kjör og vinnuaðstæður hafi þar leikið stórt hlutverk,“segir í ályktun í félagsins.

FAL segir stjórnvöld hafa lítinn skilning á þeim raunveruleika sem heilbrigðiskerfið og sjúklingar þess búi við þar sem álag á marga lækna sem umfram öryggismörk. Félagið hefur þungar af framtíð heilbrigðisþjónustunnar ef kjör lækna verði ekki bætt.

Hér að neðan má sjá ályktun félagsins í heild sinni:

Stjórn Félags almennra lækna (FAL) harmar að samningaviðræður ríkis og lækna hafi siglt í strand. Heilbrigðisþjónustan er ein af grunnstoðum samfélagsins og telur stjórn FAL að hún glími nú þegar við veruleg vandamál vegna ónógrar nýliðunar og landflótta lækna síðast liðinn áratug. Slök kjör og vinnuaðstæður hafi þar leikið stórt hlutverk.

Stjórn FAL áréttar að neyðarmönnun lækna í verkfalli sé í sumum tilvikum allt að þreföld sú mönnun sem er við lýði dags daglega og telur þetta endurspegla skilningsleysi stjórnvalda á þeim raunveruleika sem heilbrigðisstofnanir og sjúklingar standa frammi fyrir.

Starfsumhverfið er fámennt og álag á marga lækna langt fram yfir öryggismörk. Stjórn FAL hefur þungar áhyggjur af framtíð íslensks heilbrigðiskerfis ef kjör lækna verða ekki bætt.