Engar miskabætur vegna handtöku í Búsáhaldabyltingunni

Kona sem var handtekin í mótmælum við Alþingishúsið í janúar 2009 mun ekki fá greiddar miskabætur vegna handtökunnar. Hún hafði krafist þriggja milljóna króna frá íslenska ríkinu.  Konan var ein þeirra sem lögregla handtók og batt með plastreipi í mótmælum við þinghúsið við upphaf Búsáhaldabyltingarinnar. 

Vegna aðstæðna á vettvangi hafi ekki reynst gerlegt að flytja hina handteknu á lögreglustöð til yfirheyrslu þegar í stað og því þurftu þeir að bíða í vörslu lögreglu á staðnum. Farið var með hina handteknu í bílastæðiskjallara undir þinghúsinu.

Í dómnum segir að konan hafi upplifað handtökuna þannig að henni hafi verið hrint fast að glervegg nýbyggingar Alþingishússins af lögreglu á meðan hún hafi verið handjárnuð. Að því búnu hafi hún ásamt öðrum handteknum mótmælendum verið flutt niður í bílakjallara undir Alþingishúsinu þar sem henni var komið fyrir í röð ásamt öðrum sem einnig voru handjárnaðir.

Var þeim handteknu þá gert að sitja þar á gólfi gegnt hvert öðru í gleiðri stöðu þannig að fætur krossuðu fætur annarrar handtekinnar manneskju. Þá segir að meðan konan sat handjárnuð í þessari stöðu hafi tilteknir lögreglumenn á staðnum viljað ræða við hana önnur óskyld mál að öðrum áheyrandi og henni hafi þótt það bæði auðmýkjandi og óviðeigandi. 

Hún var síðan flutt í fangaklefa. Taldi konan frelsissviptinguna vera óréttmæta þar sem hún hafi verið að tjá pólitískar skoðanir sínar með friðsamlegum hætti. Ekkert hefði heldur komið fram í málflutningi lögreglu sem réttmætti handtökuna. Lögreglan mótmælti þessum málflutningi konunnar sem sagði konuna hafa hafa hindrað störf lögreglu við að verja Alþingishúsið. Þá hafi hún gengið hvað harðast fram við að stofna þar til uppþota og gera aðsúg að lögreglu.

Konan var ákærð fyrir að reyna að koma í veg fyrir að handtaka mann í janúar 2011 en var sýknuð af þeirri kröfu. Konan krafðist einnig bóta vegna þeirrar handtöku en dómari hafnaði þeirri kröfu.