Bandarískir ferðamenn hólpnir úr villu

Tveir bandarískir ferðamenn skiluðu sér heilir á húfi niður á Hesteyri við Jökulfirði í Ísafjarðardjúpi seint í gærkvöldi, en þeir höfðu haft samband við lögregluna á Ísafirði í gærdag og sagst vera villtir.

Lögregla taldi þó ekki ástæðu til að senda strax út leitarflokka, þar sem mennirnir voru vel búnir og gott veður var á svæðinu. Leit var því ekki  hafin þegar þeir skiluðu sér til byggða, en nú er frístundabyggð á Hesteyri eftir að föst búseta lagðist þar af á síðustu öld.