Söguleg stríðsflugvél á Reykjavíkurflugvelli

Stríðsflugvél sem gegndi lykilhlutverki í sögulegustu innrás síðari heimstyrjaldar má nú sjá á Reykjavíkurflugvelli þar sem hún lenti síðdegis. Verið er að ferja flugvélina yfir Atlanthafið frá flugminjasafni í New York ríki í Bandaríkjunum en hún er á leið til Normandí í Frakklandi.

Hún lenti í Reykjavík eftir fimm tíma flug frá Grænlandi. Þetta er Douglas C-47, einnig þekkt sem DC-3, en hún verður einn helsti sýningargripurinn í minningarathöfnum í Evrópu í tilefni þess að þann 6. júní verða sjötíu ár liðin frá D-deginum, upphafsdegi innrásarinnar sem breytti gangi heimstyrjaldarinnar.

Þessi var forystuvél í annarri bylgju flugvéla sem lögðu af stað frá Englandi seint að kvöldi þann 5. júní 1944. Fallhlífarhermennirnir sautján um borð unnu mikið afrek, en þeir voru í hópi þeirra sem náði franska bænum Sainte-Mere-Église í vald sitt, fyrsta bænum sem bandamenn frelsuðu úr höndum Þjóðverja í heimstyrjöldinni síðari. 

„Þetta er mjög söguleg flugvél,“ sagði flugstjórinn, Chris Polhemus, viðtali við Stöð 2. Nánar í fréttum Stöðvar 2.