Sex hundruð missa atvinnuleysisbætur um áramótin

Í fjárlagafrumvarpinu er gert ráð fyrir að spara 1,1 milljarð króna á næsta ári með því að stytta bótatímabil atvinnulausra úr þremur árum í tvö og hálft ár um næstu áramót.

Samkvæmt samantekt Vinnumálastofnunar þýðir það að 623 missa rétt sinn til bóta og detta út af skránni á einu bretti um áramótin en að jafnaði hafa á milli 80 og 90 atvinnulausir fullnýtt rétt sinn til atvinnuleysisbóta í hverjum mánuði á þessu ári.

Vinnumálastofnun áætlar að 900 til 1.000 einstaklingar hafi eða muni fullnýta rétt sinn til atvinnuleysisbóta á þessu ári.

Fjölmennasti aldurshópurinn sem tapar bótarétti er fólk á milli 30 og 40 ára, eða 190 manns, þar af eru konur mun fjölmennari, eða 124. Þegar menntun hópsins í heild er skoðuð kemur í ljós að 285 hafa lokið grunnskólaprófi, næstfjölmennasti hópurinn sem tapar bótarétti um áramót eru háskólamenntaðir, eða 135 manns.

Þeir sem missa rétt til atvinnuleysisbóta eiga rétt á framfærslustyrk frá sínu sveitarfélagi, hann ræðst þó af félagslegri stöðu viðkomandi og hvort hann á maka sem getur eða vill hafa viðkomandi á framfæri.

Sveitarfélögin eru ekki sátt við að fá allan þennan fjölda yfir til sín um áramótin. „Þetta er ansi bratt,“ segir Halldór Halldórsson, formaður Sambands íslenskra sveitarfélaga, og bendir á að það sé ansi stutt síðan bótarétturinn var styttur úr fjórum árum í þrjú. Hann segir að verið sé að færa kostnað frá ríkinu til sveitarfélaganna. „Við viljum að það verði farið í atvinnuátak til að mæta þessu. Þetta er þvinguð verkefnafærsla á milli ríkis og sveitarfélaga,“ segir Halldór.