Umboðsmaður krefur ráðherra svara vegna flutninga Fiskistofu

Umboðsmaður Alþingis hefur óskað eftir svörum frá Sigurði Inga Jóhannssyni, sjávar- og landbúnaðarráðherra, vegna fyrirhugaðra flutninga Fiskistofu af höfuðborgarsvæðinu til Akureyrar. Óskar umboðsmaður eftir gögnum sem styðja lagalega ákvörðun ráðherra vegna flutninganna. RÚV greinir frá.

Umboðsmaður sendir bréfið í kjölfar beiðni starfsmanna Fiskistofu sem leituðu til hans og kvörtuðu yfir flutningunum. Krefjast þeir upplýsinga um á hvaða lagalega grundvelli hafi verið byggt þegar starfsmönnum var tilkynnt í sumar að flutningar stæðu til. Vísað er í orð Sigurðar Inga í fréttum RÚV þremur dögum síðar þar sem fram kom að tryggt yrði að flutningarnir yrðu með löglegum hætti.

Umboðsmaður óskar einnig eftir afstöðu ráðherra til þess hvernig það samrýmist vönduðum stjórnsýsluháttum að kynna starfsfólki flutninginn með þeim hætti sem gert var. Þá er óskað eftir öllum þeim gögnum sem tekin hafa verið saman um heimild ráðherra til að ákveða flutninganna.

Ráðherra hefur til 10. desember til að svara bréfi umboðsmanns.