Gengið framhjá grátandi konu í Hagkaupum: „Svona er bara Ísland“

„Þetta var voða leiðinlegt,“ segir Bryndís Hera Gísladóttir, sem deildi nokkuð magnaðri frásögn á Facebook-síðu sinni um helgina. Þar segir hún frá grátandi konu í miklu uppnámi sem hún mætti í verslun Hagkaupa í Skeifunni aðfaranótt laugardags. Konan bað um að fá að hringja í dóttur sína en Bryndís telur að fjórir eða fimm hafi gengið fram hjá konunni er hún bað um hjálp.

„Þau svöruðu ekki, sögðu síminn minn er bara dauður,“ segir Bryndís í samtali við Vísi. „Virtu hana ekki viðlits. Fólk vill meina að enginn hafi stoppað vegna þess að allir eru með svo dýra síma. En hún fékk aldrei símann minn, ég bara fékk númerið og hringdi fyrir hana. Maður þarf ekki að vera leiðinlegur þó maður sé með dýran síma.“

Bryndís beið ein með konunni eftir að dóttir hennar kæmi. Að sögn Bryndísar sagðist konan hafa verið lamin af eiginmanni sínum fyrr um nóttina. Frásögnin var óskýr en Bryndís skildi konuna þannig að maðurinn hefði verið handtekinn þessa sömu nótt. Þess verður þó að geta að slíks tilfellis var ekki getið í skýrslu lögreglunnar á höfuðborgarsvæðinu um helgina.

„Hún segir að hann sé kominn í fangelsi en hann hafi reynt að drepa hana tvisvar og hún verði marin á morgun og segir mér bara þetta allt,“ segir Bryndís. „Hún hefði ratað niður í Skeifuna en engin gæti hjálpað henni að hringja. Hún sagði svo oft: „Svona er bara Ísland.““

Dóttir konunnar kom að lokum og sótti hana. Bryndís segir konuna hafa sagst ekki ætla að fara aftur til mannsins síns. Bryndís er hissa og ósátt á því að enginn hafi gefið sér tíma í að aðstoða konuna áður en hún gerði það.

„Það er engin afsökun fyrir þessu,“ segir Bryndís. „Hún kom bara þarna inn og þarf hjálp. Að fólk skuli ekki stoppa, þetta hefði getað verið hver sem er.

Þetta er eins og þegar maður sér bíl úti í kanti í umferðinni. Það eru alltof margir Íslendingar sem  fara sem lengst frá þessu til þess að þurfa ekki að fara út og hjálpa.“

Facebook-færslu Bryndísar Heru má sjá í heild sinni hér fyrir neðan.

Innlegg frá Bryndís Hera Gísladóttir.