Lögreglan rannsakar árásina á Benna Ólsara

Lögreglan rannsakar nú líkamsárás sem framin var fyrir utan Sporthúsið á miðvikudaginn í síðustu viku. Þá var ráðist á Benjamín Þór Þorgrímsson, sem einnig er þekktur sem Benni Ólsari. Hann starfar sem einkaþjálfari í Sporthúsinu.

Vísir fjallaði um málið, en vinur Benjamíns, Gilbert Sigurðsson, vakti athygli á málinu með skrifum á Facebook. Gilbert segir árásina tengjast langvinnum deilum sínum við Hilmar Leifsson. Gilbert segir frá því á Facebook að fimm hettuklæddir menn hafi ráðist á Benjamín með þeim afleiðingum að hann nefbrotnaði auk þess sem hann hlaut innvortisblæðingar, eins og hann tjáði Vísi daginn eftir árásina.

„Ég er með brotið nef og bar á innvortis blæðingu eftir árásina. Svo er ég bara lemstraður út um allt. Þeir voru vopnaðir kylfum. Ég reyndi bara að verja á mér andlitið til að detta ekki út.“

Málið var kært til lögreglu á föstudaginn og verður rannsakað sem líkamsárás, þetta staðfesti varðstjóri í samtali við blaðamann Vísis.

Langvinnar deilur

Gilbert telur að þessi árás tengist deilum sínum við Hilmar Leifsson og að mennirnir fimm hafi verið á hans vegum. Á þriðjudaginn í síðustu viku óskaði Gilbert eftir sáttum við Hilmar: „Á þriðjudag hendi ég inn hvítum fána og lýsi þessu stríði lokið af minni hálfu og þeim sem hafa stutt mig og fórnalömb þín!

Þitt svar er mjög augljóst og það er að ráðast á vin minn í gær daginn eftir að ég skrifa statusinn. 5 menn hettuklæddir, hálft fótboltalið með kylfur réðst aftan að honum og reyndu þeir að berja hann eins og þeir gátu og honum tekst að verjast höggum lang flestum sem töldu yfir 50 -70 högg og nær að koma sér inn í bílinn sinn og bregst á það ráð að reyna keyra þessar hetjur niður!“

Sjá einnig: Rafbyssu beitt í slagsmálum í Laugardal

Benjamín er á sömu skoðun og Gilbert, eins og kemur fram í viðtali við Vísi. „Það var greinilega verið að reyna ná sér niður á Gilla þar sem ég er vinur hans,“ segir hann og bætir við:

„Þetta voru menn sem voru greinilega frá Hilmari Leifssyni. Gilli setti upp færslu og þetta er bara svarið frá þeim.“

Sjá einnig: Myndband af slagsmálunum á Café Milano komið á netið

Benjamín segist vera löngu hættur öllum afskiptum úr undirheiminum. 

„Ég er bara að reyna halda vinnunni og er í dag einkaþjálfari í Sporthúsinu. Það er bara verið að reyna skemma fyrir mér. Ég er einn vinsælasti einkaþjálfarinn á Íslandi í dag og þegar vel gengur hjá manni á að reyna eyðileggja. Þeir þola bara ekki að ég sé edrú og að lifa góðu lífi. Það er verið að reyna draga mig inn í myrkrið.“

Ef lesendur hafa nánari upplýsingar um þá atburði sem hér eru til umfjöllunar eða ábendingar, þá endilega sendið skilaboð þess efnis á ritstjorn@visir.is