Lét greipar sópa á hótelbarnum

Karlmaður í annarlegu ástandi ruddist inn á hótel í miðborginni á tólfta tímanum í gærkvöldi og tók að hrifsa til sín áfengisflöskur af barnum. Í hamaganginum féllu nokkrar aðrar í gólfið og brotnuðu.

Þegar starfsmaður hótelsins reyndi að tjónka við manninn, hafði hann í hótunum við starfsmanninn og reyndi að slá til hans, en hann sakaði ekki.

Áður hafði hann hringt á lögreglu, sem hafði upp á manninum á gangi skömmu síðar með veigarnar, sem reyndust vera cognac af betri gerðinni, að sögn lögreglu, sem handtók manninn og vistaði í fangageymslu.

Þá var einn ökumaður stöðvaður í Norðlingaholti í nótt sem reyndist vera undir áhrifum fíkniefna.