Óþolandi meðferð á íslensku

Með tilkomu Internetsins eru margir á þeirri skoðun að tungumálið okkar, íslenskan, fái oftar en ekki slæma útreið. Lesendur fréttamiðla á borð við Vísi, Mbl og fleiri láta reglulega vita af því að ýmislegt mætti betur fara í meðferð okkar ástkæra ylhýra. Auk þess lætur fólk í sér heyra í athugasemdakerfum þar sem ýmislegt er látið flakka.

Sumar villur virðast algengari en aðrar og er óhætt að segja að sumar stuði lesendur sérstaklega mikið. Stundum er hreinlega um innsláttarvillur að ræða en einnig er þágufallssýkin klassísk. Svo verður að hafa í huga að sumir lesendur eiga erfiðara bæði með lestur og skrift og verður að taka tillit til þeirra. Allir hafa rétt á að tjá sig.

Hér að neðan hafa verið teknar saman sex af algengustu málvillunum á netinu í dag.

1. „Víst að“ í staðinn fyrir „fyrst að“

Dæmi: Ætli ég fari ekki að koma mér heim víst að klukkan er orðin svona margt.

2. „Mér hlakkar“ í staðinn fyrir „Ég hlakka“

3. „Mig hlakkar í staðinn fyrir „Ég hlakka“

Sumir ætla aldeilis ekki að láta grípa sig í bólinu og segja mig hlakkar í staðinn fyrir mér hlakkar. Augljóslega er hið fyrra engu betra en hið síðara.

4. „Ég vill“ í staðinn fyrir „Ég vil“.

5. „Mér langar“ í staðinn fyrir „Mig langar“

6. „Þæginlegt“ í staðinn fyrir „þægilegt“

Vísir hvetur lesendur til að deila með öðrum lesendum málvillum sem þeir taka sérstaklega mikið eftir. Endilega tilgreina ef sérstakar villur fara í taugarnar á fólki og þá hvers vegna.

Uppfært klukkan 22:29

Á einhvern óskiljanlegan hátt gleymdist að nefna málvilluna „þæginlegt“. Eru lesendur beðnir afsökunar á því. Gjörsamlega óbærileg villa.