Starfsmenn Barnaverndarstofu höfðu ekki heyrt alla söguna

Starfsmenn Barnaverndarstofu voru ekki meðvitaðir um að til stæði að bjóða einum starfsmanni að starfa fyrir nefnd á vegum Velferðarráðherra um endurskipulagningu félagsþjónustu og barnaverndarmála.

Í Fréttablaðinu á miðvikudaginn var greint frá því að allar líkur væru á að ný stjórnsýslustofnun, sem taka á yfir málefni Barnaverndarstofu, Fjölmenningarseturs, réttargæslumanna fatlaðs fólks auk verkefna sem félagsmálaráðuneytið sinnir, verði höfð á landsbyggðinni

„Það er talað um mikilvægi þess í stjórnarsáttmálanum að flytja opinber störf út á land,“ segir Eygló Harðardóttir félagsmálaráðherra. Fyrrnefnd nefnd hefur verið skipuð af því tilefni.

Starfsmenn Barnaverndarstofu sendu frá sér yfirlýsingu í morgun þar sem sagði að ummæli ráðherra „um staðarval nýrrar stofnunar valdi þeim áhyggjum og bendi til þess að önnur sjónarmið séu talin mikilvægari en velferð barna.“

Eygló Harðardóttir sagði í tilkynningu frá ráðuneytinu í hádeginu í dag að það sætti furðu að samráðsleysi væri gagnrýnt í yfirlýsingu starfsmanna Barnaverndarstofu. Búið væri að bjóða Barnaverndarstofu að tilnefna starfsmann til að vinna fyrir nefndina þó ekki væri um fulltrúa í nefndinni að ræða.

Bragi Guðbrandsson, forstjóri Barnaverndarstofu, staðfestir í samtali við Vísi að óformleg samtöl hafi átt sér stað á milli sín og starfsmanna ráðuneytisins vegna þess möguleika að starfsmaður Barnaverndarstofu ynni með nefnd ráðuneytisins.

„Starfsmennirnir höfðu enga vitneskju um annað en að vinna ætti starfið án aðkomu Barnaverndarstofu,“ segir Bragi. Samtöl hans við ráðuneytið hafi verið óformleg og því hafi honum aldrei þótt tilefni til að upplýsa starfsfólk sitt um það.

Bragi segist muna funda með starfsmönnum Barnaverndarstofu á mánudaginn, líkt og aðra mánudaga, þar sem farið verði yfir málið. Hann reiknar svo með því að tilnefna starfsmann fyrir nefndina að höfðu samráði við starfsfólk sitt.

„Fyrst þarf ég að fá nánari upplýsingar frá ráðuneytinu um hve mikla vinnu sé að ræða. Hvort starfsmaður sitji fundi, hvaða sérfræðiþekkingar sé óskað eftir og þar fram eftir götunum.“