Husky-hundur drap sex lömb

Husky-hundur, sem slapp frá ferðamönnum og gekk laus í sex daga á Snæfellsnesi, drap sex lömb og særði eitt í liðinni viku. RÚV greindi fyrst frá málinu.

Þóra Sif Kópsdóttir, bóndi á Ystu-Görðum, átti lömbin. Hún segir í samtali við Vísi að hundurinn hafi sloppið frá eigendum sínum á sunnudeginum fyrir viku en enginn af íbúum í sveitinni hafi haft hugmynd um að hundur gengi laus á svæðinu.

„Við sjáum fyrsta lambið á miðvikudeginum. Það var úti í miðjum læk svo við komumst ekki til að ná í það. Þar af leiðandi vissum við ekki hvernig það hafði dáið. Á miðvikudeginum sjáum við svo reyndar auglýsingu á Facebook þar sem lýst er eftir hund sem hafði sloppið.“

Þóra segir að á föstudeginum hafi þau síðan komið á auga á blóðugt lamb úti í læk. Þá hafi þau vitað að eitthvað mikið væri að og hafið leit að hundinum. Hann fannst svo á laugardeginum þegar verið var að smala. Hundurinn var aflífaður á staðnum.

Öll lömbin sem fundust voru úti í læk. Þóra segir að þegar lömb þurfi að verja sig og séu uppgefin þá leiti þau í vatn.

Aðspurð segir hún að eigendur hundsins séu nú að athuga með tryggingar svo hægt sé að bæta tjónið sem hundurinn olli.