Á leið til Gasa með 58 kíló af efni í gervifætur

„Ég er að taka rúm 58 kíló af efni í gervifætur, fyrir utan minn eigin farangur,“ sagði Sveinn Rúnar Hauksson, formaður Ísland-Palestína, þegar Vísir náði tali af honum fyrr í dag. „Þetta á að duga í tuttugu gervifætur sem eiga að hjálpa tuttugu manns og að auki er ég með verkfæri sem vantaði, í samræmi við óskalista sem kom frá gervilimastöðinni ALPC í Gasaborg.“

Sveinn Rúnar var staddur á Keflavíkurflugvelli þegar Vísir náði tali af honum en hann flaug af landi brott um hádegisbil. „Ég er enn og aftur á leiðinni til Gasa, reyndar með viðkomu á Vesturbakkanum,“ en Sveinn Rúnar sem gerir ráð fyrir að vera úti í um þrjár vikur.

„Ég ætla að heimsækja okkar samstarfsaðila og fylgja eftir og hafa eftirlit með því hvernig gengur að koma okkar aðstoð til skila. Það safnaðist mjög mikið í sumar og það hefur alltaf verið okkar kjörorð að hver einasta króna komist óskert til skila,“ segir Sveinn Rúnar sem mun fyrst fljúga til Amman í Jórdaníu áður en hann fer á Vesturbakkann og svo Gasa.

Þörfin aldrei eins átakanleg og núna

Sveinn Rúnar segir beiðni hafa komið til félagsins Ísland-Palestína frá Gervilimastöðinni á Gasa sem félagið hefur unnið með síðan 2009. „Það samstarf byrjaði að frumkvæði Össurar Kristinssonar og hans fyrirtækis, OK Prosthetics, sem hefur víða um heim verið að kenna fólki hvernig á að smíða hágæðagervifætur á örstuttum tíma. Þetta er það sem gerst hefur á Gasa. Ég hef notað hverja ferð til að fara með efni til viðbótar, reyndar aldrei meira en núna, enda þörfin sennilega aldrei eins átakanleg eins og núna eftir þetta fimmtíu daga árásarstríð í sumar.“

Sveinn Rúnar segist jafnframt ætla að fylgjast með öðrum verkefnum félagsins. „Við erum í samvinnu við Læknishjálparsamtökin á Gasa sem eru að dreifa neyðaraðstoð til fólks sem hefur misst allt og höfum raunar leitað eftir samvinnu við utanríkisráðuneytið og mætt góðum velvilja þar.“

Að sögn Sveins Rúnars mun hann einnig heimsækja annað verkefni sem Ísland-Palestína hefur verið með í gangi. „Það er stuðningur við AISHA-kvennahúsið, sem er sambland af Stígamótum, kvennaráðgjöf og starfsþjálfun fyrir konur og börn sem hafa þurft að þola ofbeldi. Við höfum því verið að safna fyrir innkaupum á efni í gervifæturna, styðja kvennahúsið og læknishjálparsamtökin í neyðarhjálpinni.“

Post by Björk Vilhelmsdóttir.